बाँदरले मुठ्ठी खोलेन, कस्तो मुर्ख ? – १ मिनेट अध्ययन

“धन छ । इज्जत छ । परिवार छ । तर, मन भित्रको उकुसमुकुसले कहिलै छोडेन गुरुजी ।” भद्रपारामा उमेशले भने ।

उमेश शहरका नामी र सफल व्यवसायी । उनी गुरुलाई एकदमै सम्मान गर्छन् । उनले सँधै जसो गुरुसँग गर्ने गनथन यस्तै हुन्छ ।

उमेशको गुनासो सुने पछि पनि गुरुले त्यसबारे केहि भनेनन् । बरु आफ्नो गेरुवस्त्र मिलाउँदै उठेर भनेँ, “गाउँतिर विचरण गर्ने इच्छा भो । तपाई चाहनुहुन्छ भने मसँगै हिड्न सक्नुहुन्छ । बाटोमा मौका मिलाएर तपाईको समस्याका बारेमा पनि कुरा गरौला ।”

उमेशले गुरुलाई पछ्याए । उनीहरु केहिबेरमा गाउँ नजिकैको जंगलमा पुगे ।

“यी सबै नरिवलमा किन एकै खालका प्वालहरु छन् ?” जंगलमा प्वाल परेका नरिवलहरु जतासुकै लडेका थिए । तिनै नरिवलहरु देखेर उमेशले उत्सुकतापुर्वक गुरुलाई सोधेका थिए ।

“यी बाँदरहरुलाई जालमा पार्नका लागि गाउँलेहरुले राखेका हुन् ।” गुरुले भेद खोले, “यी प्वालभित्र नरिवलमा गाउँलेहरु केरा राखिदिन्छन् । बाँदर केराको लोभमा प्वाल भित्र हात घुसार्छ । केरा समात्छ । उ केरा गुमाउँने डरमा हात खोल्दैन । उसको मुठ्ठी परेको हात कसै गरेर पनि प्वालबाट बाहिर निस्किन सक्दैन । र, उ भारी नरिवल लिएर टाढा भाग्न पनि सक्दैन । उ जालमा पर्छ ।”

उमेश छक्क पर्दै भने, “केराको लोभमा मुठ्ठी नखोल्नाले स्वतन्त्र भएर पाउँने खुसी र कहिलेकाँही त ज्यानसम्म गुमाउँने रहेछ बाँदरले ।”

“हो । हामी जस्तै ।” गुरुले मुस्कुराएर उमेशतिर हेर्दै भनेँ, “हामी पनि त आफ्ना वा परिवारका सानाठुला लोभ, चाहना, रहरलाई मुठ्ठी पार्न खोजेर जीवनको उज्यालो पाटो नै गुमाउँछौ । यति भए म भोली खुसी हुन्छु भन्दै आजको खुसी भोग्नै बिर्सन्छौँ ।”

सेयर गर्नुहोला ।

नमस्ते, म गणेश कार्की । एउटा आममान्छे । सामाजिक सञ्जाल मात्रै होइन, हाम्रो समाज नै नकारात्मक खबर र जानकारीहरुले भरिएको छ । ‘नकारात्मक मात्रै बिक्छ’ भन्ने सोच व्याप्त छ । यस्तोमा सकारात्मक कुरा लेखेर पनि व्यवसायिक हुन सकिन्छ भन्ने उदाहरण देखाउँने मेरो सानो प्रयास हो । उज्यालो पाटोमा म जीवनको उज्यालो पाटोको बारेमा लेख्छु । अथवा, जीवनलाई उज्यालो पाटोमा कसरी लैजाने भन्ने बारेमा आफुले देखेका भोगेका र पढेका कुराहरु बाढ्नेछु । सामाजिक सञ्जालमा अलिकति भए पनि सकारात्मक र ज्ञानवद्धर्क कुराहरु सेयर हुन योगदान गर्न सकुँ । यस्ता कुरा पढ्न चाहनेले पढ्ने ठाउँ बनोस् । यस्ता कुरा लेख्न सक्नेहरु व्यवसायिक रुपमा लेख्ने हिम्मत गर्न सकुन् । मेरो इच्छा यति हो । यो भन्दा धेरै हाशिल भए म झन् खुसी हुनेछु । मलाई फेसबुकमा, ट्विटरमा भेट्न सक्नुहुनेछ । मेरो बारेमा थप जानकारी यहाँ पाउँनु हुनेछ

गणेश कार्की – who has written posts on उज्यालो पाटो.


One thought on “बाँदरले मुठ्ठी खोलेन, कस्तो मुर्ख ? – १ मिनेट अध्ययन

Post Comment